KEGOC компаниясының акциялары барлық қазақстандықтарға қолжетімді болды-16 қазанда SPO-ның екінші кезеңі басталды. Алматыда әлеуетті инвесторлармен кездесу барысында KEGOC өкілдері еліміздің жетекші энергетикалық компаниясының акцияларын қайталама орналастыруға қатысу үшін жаңа инвесторлардан өтінімдер жинаудың басталғаны туралы хабарлады, ол 2 қарашаны қоса алғанда жалғасады.
«Өтінімдерді брокерлер, банктер мен Tabys қосымшалары, сонымен қатар «Қазпочта» АҚ бөлімшелері арқылы онлайн және офлайн беруге болады. Сонымен қатар, SPO-ның бірінші кезеңі - KEGOC-тың 17 және одан да көп акцияларына иелік ететін қазіргі акционерлер үшін акцияларды басымдықпен сатып алу құқығын іске асыру кезеңі жалғасуда. SPO 28 қыркүйекте басталды және 27 қазанды қоса алғанда 30 күнге созылады. Қазіргі акционерлер брокерлер арқылы немесе тікелей KEGOC арқылы өтініш бере алады», – деп атап өтті «KEGOC» АҚ Қаржы және есепке алу жөніндегі басқарушы директоры Айгүл Әкімбаева.
Компанияның топ-менеджері акцияларды сатып алудың негізгі себептерін, соның ішінде электрмен жабдықтау нарығындағы негізгі жағдайды, компанияның маңызды активтерін, кірістердің тұрақты өсуін, инвесторларға дивидендтер төлеудің мінсіз тарихын және брокерлердің KEGOC акцияларының құнын бағалауды атады.
«Компанияның тұрақты еркін ақша ағыны бар және дивидендтерді тұрақты түрде төлейді. Орналастырудың барлық кезеңінде (2014 жылдан бастап) төленген дивидендтердің сомасы 218 млрд теңгені құрады. KEGOC жыл сайын акционерлерге жылына екі рет дивидендтер төлейді. Дивидендтер алуды және 9 жылдағы бағаның өсуін ескере отырып, IPO күнінен бастап акциялар бойынша кірістіліктің өсуі – 400%. Ағымдағы жылы дивидендтерді бөлу таза пайданың 40% - нан 60% - ына дейін артып, компания дивидендтік саясатты жаңартты», – деп ерекше атап өтті KEGOC Қаржы және есепке алу жөніндегі басқарушы директоры Айгүл Әкімбаева.
SPO шеңберінде акционерлерге 15 294 118 жай акцияны ұсынады, бұл ретте «Самұрық-Қазына» АҚ-ның үлесі компания акцияларының жалпы санының кемінде 85%-ын құрайды. Бір жай акцияның бағасы 1482 теңге. Жетекші брокерлік-дилерлік ұйымдардан KEGOC акциясының нысаналы құны осы мәннен жоғары және 1950 теңгеге дейін жетеді.
«Қор биржасындағы IPO сәтінен (2014 жылдан- Ескертпе) бастап KEGOC акцияларының бағасы үш еседен астам 505 теңгеден 1525 теңгеге дейін өсті. Брокерлердің орташа болжамды бағасы 1817 теңге, компания акцияларының ағымдағы нарықтық құнынан жоғары, брокерлердің ұсынысы – «сатып алу». Компания акционерлер алдындағы барлық міндеттемелерін орындайды. KEGOC жылына екі рет акционерлерге дивидендтер төлейді. Эмитенттің мінсіз беделі бар және компанияның кірісті ұлғайтудың барлық алғышарттары бар», – деді «Jusan Invest» АҚ басқарушы директоры Жәмилә Сәрсенбаева.
Өсудің айтарлықтай әлеуеті жаңа реттеуші өзгерістерге және ҰЭТ-ты пайдалану жөніндегі жаңа қызметтің пайда болуына байланысты. 2023 жылдың бірінші жартыжылдығындағы таза пайда 2022 жылдың ұқсас кезеңімен салыстырғанда бір жарым есеге – 14 млрд теңгеден 23 млрд теңгеге дейін өсті. Ағымдағы жылдың қорытындысы бойынша KEGOC-тың таза пайдасы шамамен 31,5 млрд теңге деңгейінде күтілуде, бұл 2022 жылғы көрсеткіштен 4,8 млрд теңгеге артық. 2023 жылдың бірінші жартыжылдығында негізгі қызметтен түскен табыс 11,3% - ға немесе 11,56 млрд теңгеге, яғни 102,8 млрд теңгеден 114,4 млрд теңгеге дейін өсті.
Кездесу барысында спикерлер қатысушылардың сұрақтарына жауап беріп, компанияның одан әрі даму жоспарлары туралы әңгімеледі. Алматы KASE Fest қазақстандық брокерлер жәрмеңкесі шеңберіндегі кезекті қала болды. Алғашқы кездесулер бұған дейін Павлодар мен Астанада өткен, келесі кездесу Ақтөбеде (20 қазан) өтті. Кіру тегін, өткізу орны мен уақыты туралы ақпарат мына жерде қол жетімді. Роуд-шоу аясында кездесулерге 2000-3000 адам қатысады деп күтілуде.
KEGOC SPO-сы Қазақстан Республикасының Үкіметі бекіткен 2021-2025 жылдарға арналған Жекешелендіру жоспары шеңберінде және Мемлекет басшысының тапсырмасы бойынша экономиканы одан әрі мемлекет иелігінен алу, оның ішінде қосымша эмиссия жолымен мемлекеттік активтерді жекешелендіру есебінен өткізіледі.