Бүгін «KEGOC» АҚ реттелетін қызметтерінің тарифтері мен тарифтік сметаларын қолдану мерзімі аяқталғанға дейін өзгерту жобасын талқылауға арналған ашық тыңдаулар өтті.
Тарифтерді түзетудің қажеттілігі
Белгіленген тарифтерді өзгерту туралы өтінім Тарифтерді қалыптастыру қағидаларының 601-тармағына сәйкес жіберілді. Тарифтерді қайта қараудың негізгі себептері мыналар:
- Стратегиялық тауарлар құнының өзгеруі;
- Мемлекеттік бағдарламалар мен ұлттық жобалар шеңберінде бекітілген инвестициялық бағдарламаны түзету;
- Статистика деректері бойынша қызметкерлердің орташа айлық атаулы жалақысының өзгеруі.
Тарифтерді түзетудің негізгі себептері
Тарифтерді өзгерту қажеттілігінің басты себебі – 2025 жылғы 1 ақпаннан бастап ҚР Энергетика министрлігімен бекітілген электр энергиясының шекті тарифтерінің өсуі. Атап айтқанда, Бірыңғай сатып алушыға арналған электр энергиясының құны 13,1 теңге/кВтсағ-тан 24,68 теңге/кВтсағ-қа дейін артты. Бұл технологиялық шығындарды өтеу шығындарының ұлғаюына және «KEGOC» АҚ тарифтерінің өсуіне әкелді.
Инвестициялық жобалар және олардың тарифтерге әсері
ҚР Табиғи монополияларды реттеу комитеті мен ҚР Энергетика министрлігінің бірлескен бұйрығымен «KEGOC» АҚ-ның 4-ші және 5-ші базалық жылдарға арналған инвестициялық бағдарламасының түзетуі бекітілді. Бағдарлама шеңберінде «Батыс Қазақстан энергия жүйесін Қазақстан Біртұтас энергетикалық жүйесімен біріктіру» ауқымды инфрақұрылымдық жобасын қаржыландыру көзделген. Бұл жоба ҚР Президентінің тапсырмасына сәйкес жүзеге асырылып, өңірлер арасындағы транзиттік байланыстарды күшейтуге, оларды елдің Бірыңғай энергетикалық жүйесіне интеграциялауға және Қазақстан энергетикалық жүйесінің сенімділігін қамтамасыз етуге бағытталған.
Маңызды ақпарат
Электр энергиясының түпкілікті тарифі құрылымында «KEGOC» АҚ тарифтері бар болғаны 7-8%-ды құрайды. Сондықтан «KEGOC» АҚ тарифтерінің өзгеруі тұтынушылар үшін соңғы тарифтерге айтарлықтай әсер етпейді – тек 1,5-2% деңгейінде.
«KEGOC» АҚ тыңдауға қатысушыларға конструктивті диалог үшін алғыс білдіреді және ұсынылған өзгерістер ұлттық электр желісінің ұзақ мерзімді тұрақты жұмысына ықпал етеді деп сенеді.
Ашық тыңдаулар туралы хабарландыру ҚР заңнамалық нормаларына сәйкес БАҚ-та жарияланды. Іс-шараға бұқаралық ақпарат құралдарының өкілдері, тұтынушылар және басқа да мүдделі тараптар қатысты.